එවං මෙ සුතං, එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞකමි උපසඞකමිත්වා භගවන්තං අභිවාදෙත්වා එකමන්තං අට්ඨාසි.
එක මන්තං ඨිතා ඛො සා දෙවතා භගවන්තං ගාථාය අජ්ඣභාසි.
පරාභවන්තං පුරිසං
මයං පුච්ඡාම ගොතමං
භගවන්තං පුට්ඨුමාගම්ම
කිං පරාභවතො මුඛං
සුවිජානො භවං හොති
සුවිජානො පරාභවො
ධම්මකාමො භවං හොති
ධම්මදෙස්සී පරාභවො
ඉති හෙතං විජානාම
පඨමො සො පරාභවො
දුතියං භගවා බ්‍රෑහි
කිං පරාභවතො මුඛං
අසන්තස්ස පියා හොන්ති
සන්තෙ න කුරුතෙ පියං
අසතං ධම්මං රොචෙති
තං පරාභවතෝ මුඛං
ඉති හෙතං විජානාම
දුතියො සො පරාභවෝ
තතියං භගවා බ්‍රෑහි
කිං පරාභවතො මුඛං
නිද්දාසීලී සභාසීලී
අනුට්ඨාතා ච යො නරො
අලසො කොධපඤ්ඤාණො
තං පරාභවතො මුඛං
ඉති හෙතං විජානාම
තතියො සො පරාභවො
චතුත්ථං භගවා බ්‍රෑහි
කිං පරාභවතො මුඛං
යො මාතරං වා පිතරං වා
ජිණ්ණකං ගතයොබ්බනං
පහුසන්තො න භරති
තං පරාභවතො මුඛං
ඉති හෙතං විජානාම
චතුත්ථො සො පරාභවො
පඤ්චමං භගවා බ්‍රෑහි
කිං පරාභවතො මුඛං
යො බ්‍රාහ්මණං වා සමණං වා
අඤ්ඤං වාපි වණිබ්බකං
මුසාවාදෙන වඤ්චෙති
තං පරාභවතො මුඛං
ඉති හෙතං විජානාම
පඤ්චමො සො පරාභවො
ඡට්ඨමං භගවා බ්‍රෑහි
කිං පරාභවතො මුඛං
පහූතවිත්තො පුරිසො
සහිරඤ්ඤො සභොජනො
එකො භුඤ්ජති සාදූනි
තං පරාභවතො මුඛං
ඉති හෙතං විජානාම
ඡට්ඨමො සො පරාභවො
සත්තමං භගවා බ්‍රෑහි
කිං පරාභවතො මුඛං
ජාතිත්ථඬො ධනත්ථඬො
ගොත්තත්ථඬො ච යො නරො
සඤ්ඤාතිං අතිමඤ්ඤෙති
තං පරාභවතො මුඛං
ඉති හෙතං විජානාම
සත්තමො සො පරාභවො
අට්ඨමං භගවා බ්‍රෑහි
කිං පරාභවතො මුඛං
ඉත්ථිධුත්තො සුරාධුත්තො
අක්ඛධුත්තො ච යො නරො
ලඬං ලඬං විනාසෙති
තං පරාභවතො මුඛං
ඉති හෙතං විජානාම
අට්ඨමො සො පරාභවො
නවමං භගවා බ්‍රෑහි
කිං පරාභවතො මුඛං
සෙහි දාරෙහි සන්තුට්ඨො
වෙසියාසු පදිස්සති
දිස්සති පරදාරෙසු
තං පරාභවතො මුඛං
ඉති හෙතං විජානාම
නවමො සො පරාභවො
දසමං භගවා බ්‍රෑහි
කිං පරාභවතො මුඛං
අතීතයොබ්බනො පොසො
ආනෙති තිම්බරුත්ථනිං
තස්සා ඉස්සා න සුපති
තං පරාභවතො මුඛං
ඉති හෙතං විජානාම
දසමො සො පරාභවො
එකාදසමං භගවා බ්‍රෑහි
කිං පරාභවතො මුඛං
ඉත්ථිං සොණ්ඩිං විකිරණිං
පුරිසං වාපි තාදිසං
ඉස්සරියස්මිං ඨාපෙති
තං පරාභවතො මුඛං
ඉති හෙතං විජානාම
එකාදසමො සො පරාභවො
ද්වාදසමං භගවා බ්‍රෑහි
කිං පරාභවතො මුඛං
අප්පභොගො මහාතණ්හො
ඛත්තියෙ ජායතෙ කුලෙ
සො ච රජ්ජං පත්ථයති
තං පරාභවතො මුඛං
එතෙ පරාභවෙ ලොකෙ
පණ්ඩිතො සමවෙක්ඛිය
අරියො දස්සනසම්පන්නො
ස ලොකං භජතෙ සිවන්ති