සූරිය පිරිත
ඒවං මේ සුතං, ඒකං සමයං භගවා, සාවත්ථියං විහරති ජේතවනේ අනාථපිණ්ඩිකස්ස ආරාමේ. තේන ඛෝ පන සමයේන සුරියෝ දේවපුත්තෝ රාහුනා අසුරින්දේන ගහිතෝ හෝති, අථ ඛෝ සුරියෝ දේවපුත්තෝ භගවන්තං අනුස්සරමානෝ තායං වේලායං ඉමං ගාථං අභාසි :-
නමෝ තේ බුද්ධවීරත්ථු
විප්පමුත්තෝසි සබ්බධී,
සම්බාධපටිපන්නෝස්මි
තස්ස මේ සරණං භවාති.
අථ ඛෝ භගවා සුරියං දේවපුත්තං ආරබ්භ රාහුං අසුරින්දං ගාථාහි අජ්ඣභාසි :-
තථාගතං අරහන්තං
සුරියෝ සරණං ගතෝ
රාහු සුරියං පමුඤ්චස්සු
බුද්ධා ලෝකානුකම්පකාති.
යෝ අන්ධකාරේ තමසී පභංකරෝ
වේරෝචනෝ මණ්ඩලී උග්ගතේජෝ,
මා රාහු ගිලී චරං අන්තලික්ඛේ
පජං මම රාහු පමුඤ්ච සුරියන්ති.
අථ ඛෝ රාහු අසුරින්දෝ සුරියං දේවපුත්තං මුඤ්චිත්වා තරමාන රූපෝ යේන වේපචිත්ති අසුරින්දෝ තේනුපසංකමි. උපසංකමිත්වා සංවිග්ගෝ ලෝමහට්ඨජාතෝ ඒකමන්තං අට්ඨාසි. ඒකමන්තං ඨිතං ඛෝ රාහුං අසුරින්දං වේපචිත්ති අසුරින්දෝ ගාථාය අජ්ඣභාසි :-
කින්නු සන්තරමානෝව
රාහු සුරියං පමුඤ්චසි,
සංවිග්ගරූපෝ ආගම්ම
කිනනු භීතෝව තිට්ඨසීති.
සත්තධා මේ ඵලේ මුද්ධා
ජීවන්තෝ න සුඛං ලභේ,
බුද්ධගාථාභිගීතෝම්හි
නෝ චේ මුඤ්චය්‍ය සුරියන්ති.